Čáziiddikšuma ulbmilin lea viiddes ovttasbarggu vehkiin seailluhit buori čáziid dili sihke buoridit čáziid dili doppe, gos dat lea beassan hedjonit. Čáziiddikšumis lea jođus nubbi plánenmuddu, mas plánat dárkkistuvvojit ja čáziiddikšunplánat jahkái 2021 válmmaštallojit. Dát áššebábir sisttisdoallá plánema bargoprográmma ja čáziiddikšunguovllu guovddáš gažaldagaid. Áššebáhpára gullanáigi 15.6.–17.12.2012. Plánema dihte máhcahat sávvojuvvo earret eará plánema ollašuhttimis ja áigetávvalis sihke váikkuhanvejolašvuođain; birasčilgehusa ráhkadeapmái ja sisdollui gulavaš áššiin; čáziid dillái gulavaš guovddáš váttisvuođain ja ovddidandárbbuin; vugiin ja doaimmain, maidguin čáziid dili sáhttá buoridit sihke ruhtadan- ja ovttasbargovejolašvuođain. Doaibmanbirrasis leat dáhpáhuvvan nuppástusat, mat váikkuhit nuppi plánenáigodaga guovddáš gažaldagaid meroštallamii ja deattuhusaide. Ođđa láhkaásaheapmi lea boahtán lasi ja vuosttas plánenmuttu maŋŋá leat dahkkon dahje álggahuvvon máŋgga čáziiddikšumii váikkuheaddji prográmmat ja strategiijat., ee. čázádatordnenstrategiija ja guollegeaidnostrategiija. Ruvkeindustriija lassána fámolaččat Lappis. Eanadoalu birasdoarjjavuogádaga leat ođasmahttimin, mii boahtá stivret eanadoalu čáziidsuodjaleami. Vuovdedoalu doaibmanbirrasii váikkuhit vuovdedoalu ráhkadusnuppástus ja einnostuvvon boaldenmuoraid jearu lassáneapmi. Čavgi stáhtaekonomiija geahpeda almmolaš sektora vejolašvuođaid ruhtadit čáziiddikšuma. Ovdamearkan čázádatordnemiid ovddideapmi eaktuda boahttevuođas, ahte lihkostuvvo das, ahte dasa servet ođđa doaibmit. Giema čáziiddikšunguovllus čáziiddikšuma guovddáš temát laktásit ássama čáziidfuolahusa buorideapmái ja vuođđočáziid suodjaleapmái; bieđggonoađuheami ja lavdnjebuvttadeami čáziidsuodjaleapmái; birrasii vahátlaš ja váralaš ávdnasiidda; čázádatráhkadeami ja – dulvadeami hehttehusaid geahpedeapmái; čáziid- ja mearadikšuma oktiiheiveheapmái sihke čáziiddikšuma ja dulvariskkaid hálddašeami ulbmiliid oktiiheiveheapmái. Lassidieđut čáziiddikšumis neahttačujuhusas: www.ymparisto.fi/lap/vesienhoito